Як высветлілася, 16-ы год нашая краіна ўпэўнена крочыць ад прорвы да прорвы. Больш за тое, паводле версіі Лукашэнкі, цяперашнія цяжкасці – гэта кветачкі ў параўнанні з тым, што чакае беларусаў наперадзе.

-- Гэта была яма, -- прызнаўся Лукашэнка. -- У нас атрымалася ўчапіцца за край прорвы і мы сёння пачынаем узнімацца.

Але, як высветлілася, хэпі-энду ў бліжэйшай будучыні чакаць не варта. Больш за тое, на гарызонце маячаць раней нябачаныя хмары.

-- Ці тое яшчэ будзе! – паабяцаў Лукашэнка. -- Нас чакаюць яшчэ нялёгкія часы. Але мы - беларусы, і мы поўныя рашучасці пераадолець гэтыя нялёгкія часы.

Нагадаем, што перадвыбарчая праграма кандыдата Аляксандра Лукашэнкі ў 1994 годзе мела назву «Адвесці народ ад прорвы». У далейшым кіраўнік Беларусі неаднаразова заяўляў пра тое, што гэтая задача была выкананая. І вось зараз з яго словаў вынікае, што зусім нядаўна краіна пад яго чуйным кіраўніцтвам такі звалілася ў прорву і толькі ў апошні момант змагла «ўчапіцца за край прорвы».

У гэтым кантэксце фраза «ці тое яшчэ будзе!» атрымлівае асабліва змрочны сэнс. Прычым гэта той нячасты выпадак, калі пад словамі Лукашэнкі можна падпісацца на ўсё 100%.

Нас сапраўды чакаюць яшчэ нялёгкія часы. І беларусы здолеюць выкараскацца з чарговай прорвы. Але толькі ўжо без Лукашэнкі. Таму што менавіта ён з'яўляецца галоўнай крыніцай бясконцых цяжкасцяў, якія краіне даводзіцца гераічна пераадольваць замест таго, каб спакойна працаваць і радавацца жыццю.