Рэпрэсіі супраць непрызнанага ўладамі Саюзу палякаў працягваюцца. У Гародні ў кватэру Анжалікі Борыс прыехалі судовыя выканаўцы, каб апісаць маёмасць.

Як паведаміў з месца падзеі прэс-сакратар Саюза палякаў Ігар Банцар, тры судовыя выканаўцы апісалі такія рэчы, як музычны цэнтр, мікрахвалевую печку, камп'ютар, стацыянарны тэлефон, тэлевізар, новы (не устаўлены) шклопакет і сказалі, што будуць іх вывозіць.

Праз «Палоніку» Саюз палякаў на чале з Анжалікай Борыс ажыццяўляў сваю дзейнасць. Як вядома, гэтую арганізацыю беларускія ўлады адмаўляюцца рэгістраваць. Фірму пакаралі за тое, што яна атрымлівала грошы ад Польшчы на сваю культурна-асветніцкую дзейнасць, суд палічыў, што іх трэба было афармляць як гуманітарную дапамогу.

Нагадаем, што ў апошнія месяцы ў Беларусі ўзмацніліся рэпрэсіі супраць Саюза палякаў. 17 лютага польскі сейм прыняў рэзалюцыю, у якой асудзіў дзеянні Менска ў дачыненні да польскай меншасці ў Беларусі. У рэзалюцыі ўтрымліваецца рэкамендацыя разгледзець магчымасць вярнуцца да палітыкі санкцыяў у дачыненні да беларускага кіраўніцтва.