| Улады заявілі пра намер трымаць «на жорсткім кантролі» пытанні «нядобрасумленнага пасярэдніцтва, якое негатыўна ўплывае на эканамічную абстаноўку». |
Пра гэта паведаміў сёння намеснік міністра эканомікі Андрэй Тур на брыфінгу.
«Любыя
спробы і факты такіх дзеянняў будуць спыняцца, а вінаватыя будуць
прыцягвацца да адказнасці, нягледзячы на пасады», – цытуе намміністра БелТА.
Паводле
яго слоў, пераважная большасць дзяржаўных арганізацый выконваюць
усталяваны парадак набыцця тавараў, работ, паслуг і рэалізацыю
прадукцыі. Разам з тым пры правядзенні ў IV квартале 2009 года
Камітэтам дзяржкантролю комплексных праверак асобных арганізацый былі
ўсталяваныя факты нядобрасумленнага пасярэдніцтва пры закупках тавараў,
сыравіны, абсталявання. Па даручэнні Аляксандра Лукашэнкі ва ўрадзе, аблвыканкамах і Менгарвыканкаме прынятыя дадатковыя меры па ліквідацыі і спыненні неабгрунтаванага пасярэдніцтва.
Работа
па выключэнню нядобрасумленнага пасярэдніцтва ў Беларусі праводзіцца
ўвесь час. «Зразумела, што пытанні набыцця імпартных і айчынных
тавараў, рэалізацыя прадукцыі арганізацыямі, кантрольныя пакеты акцый
якіх належаць дзяржаве, сістэмна ўрэгуляваныя. Яны забяспечваюць як
ліквідацыю неабгрунтаванага і нядобрасумленнага пасярэдніцтва, так і
магчымасць яго выканання. Гэта значыць заканадаўчая база існуе», –
сказаў Андрэй Тур.
Намеснік міністра
адзначыў, што на сённяшні дзень для барацьбы з нядобрасумленным
пасярэдніцтвам ужываюцца меры, дзеючыя на заканадаўчым узроўні (гэта
конкурсная сістэма дзяржзакупак, біржавы і электронны гандаль); меры,
прынятыя на ўзроўні галіновых міністэрстваў, а таксама меры па кантролі.
Нагадаем,
што 28 ліпеня 2009 года ў Беларусі ўступіла ў сілу пастанова Саўміна №
991, якая адмяняе інстытут пасярэднікаў. Паводле пастановы, усе юрасобы
павінны купляць тавары толькі ў непасрэдных вытворцаў ці ў афіцыйных
гандлёвых прадстаўнікоў.
Кіраўнік урада Сяргей Сідорскі
прывёў аргументы на карысць забароны пасярэднікаў. Паводле яго слоў,
розніца ў кошце на адзін і той жа тавар, які набываюць беларускія
прадпрыемствы на тэрыторыі рэспублікі, складае ад 30% да 260%.
4 жніўня Аляксандр Лукашэнка
запатрабаваў ад прэм’ер-міністра «неадкладна разабрацца» з 991-й
пастановай. Увечары таго ж дня стала вядома, што Савет міністраў
адмяніў гэты дакумент. Паводле бізнэсмэнаў, за дні вымушанага прастою
з-за прынятай пастановы № 991 беларускія кампаніі панеслі страты ад 5
да 100 тысяч даляраў.